Фонди Кувайт барои рушди иқтисодии араб барои лоиҳаи нерӯгоҳи Роғун қарз ҷудо мекунад

18 декабри соли 2024 Ҳукумати Ҷумҳурии Тоҷикистон ва Фонди Кувайт барои рушди иқтисодии араб (KFAED) Созишномаи қарзӣ ба маблағи умумии 100 миллион доллари ИМА-ро ба имзо расониданд, ки ҳадафи он дастгирии сохтмони Нерӯгоҳи барқи обии «Роғун» мебошад. Тибқи ин созишнома, Фонди Кувайт ба Тоҷикистон қарзи имтиёзнок ба маблағи 5,2 миллион динори кувайтӣ бо шартҳои мусоиди молиявӣ пешниҳод мекунад.

Маблағҳои қарз танҳо барои маблағгузории хароҷоти мувофиқ, аз ҷумла харидории молу таҷҳизоти зарурӣ барои татбиқи лоиҳаи НБО «Роғун» истифода хоҳанд шуд. Тартиби ҷудо ва истифодаи маблағҳо таҳти назорати Фонди Кувайт ва мутобиқи расмиёти мувофиқашудаи харид амалӣ мегардад.

Ҳамоҳангсозии умумӣ ва назорати татбиқи лоиҳа ба зиммаи Гурӯҳи татбиқи лоиҳаҳои сохтмони иншооти энергетикӣ назди Президенти Ҷумҳурии Тоҷикистон вогузор шудааст, дар ҳоле ки иҷрои амалиётҳои рӯзмарра, истифодабарӣ ва нигоҳдории минбаъдаи нерӯгоҳ аз ҷониби Ҷамъияти саҳомии кушодаи «НБО Роғун» амалӣ карда мешавад.

Маблағгузории Фонди Кувайт маблағҳои қаблан ҷалбшуда ва дар назар дошта шудани сарчашмаҳои дигари молиявии хориҷиро пурра мекунад, аз ҷумла қарзҳои Бонки исломии рушд, Фонди Саудии рушд, инчунин дастгирии эҳтимолии Бонки ҷаҳонӣ, Фонди ОПЕК оид ба рушди байналмилалӣ ва Фонди рушди Абу-Даби. Татбиқи лоиҳа бо риояи меъёрҳои байналмилалии экологӣ, иҷтимоӣ, ҳифзи меҳнат ва бехатарӣ анҷом дода мешавад.

Фонди Кувайт ҳамчун яке аз муассисаҳои калидии рушди минтақавӣ аҳамияти стратегии НБО «Роғун» ва саҳми онро дар рушди устувори иҷтимоию иқтисодии Ҷумҳурии Тоҷикистон таъкид намудааст.

Имзои созишномаи қарзӣ дастгирии байналмилалии молиявиро барои лоиҳаи НБО «Роғун» тақвият бахшида, сатҳи баланди эътимоди донорҳоро ба ин тарҳ нишон медиҳад. Татбиқи НБО «Роғун» аҳамияти стратегӣ дошта, барои таъмини истиқлолияти энергетикии Тоҷикистон, рушди манбаъҳои барқароршавандаи энергия ва тавсеаи имкониятҳои содироти нерӯи барқи тоза дар минтақа мусоидат хоҳад кард.