Созишномаи қарзӣ барои сохтмони НБО «Роғун» бо дастгирии Фонди иқлими Италия

Дар соли 2025 байни Ҳукумати Ҷумҳурии Тоҷикистон ва Хазинаи амонатҳо ва қарзҳои Италия (Cassa Depositi e Prestiti S.p.A. – CDP) дар доираи Фонди иқлими Италия (Fondo Italiano per il Clima) Созишномаи қарзӣ ҷиҳати дастгирии сохтмони Неругоҳи барқи обии «Роғун» ба имзо расид.

Тибқи созишномаи мазкур, ҷудо намудани маблағгузории қарзӣ ба маблағи то 150 миллион доллари ИМА барои дастгирии татбиқи ҷузъҳои интихобшудаи лоиҳа пешбинӣ шудааст.

Маблағгузории мазкур ба рушди иншооти бузурги гидроэнергетикӣ бо иқтидори муқарраршудаи 3780 мегаватт, сарбанди баландияш 335 метр ва истеҳсоли миёнаи солонаи пешбинишавандаи тақрибан 14,4 миллиард киловатт-соат неруи барқ мусоидат хоҳад кард.

Қарзи мазкур дар доираи механизми маблағгузории муштарак бо иштироки Бонки ҷаҳонӣ ва дигар ниҳодҳои байналмилалии молиявӣ пешниҳод мегардад. Ҳадафи дастгирӣ таҳкими амнияти энергетикии кишвар, коҳиш додани хавфҳои техникӣ ва экологӣ, инчунин таъмини татбиқи лоиҳа мутобиқ ба меъёрҳои байналмилалии экологӣ ва иҷтимоӣ мебошад.

Истифодаи маблағҳои қарзӣ танҳо барои хароҷоти мутобиқ ба талаботи лоиҳа пешбинӣ гардида, аз рӯи тартиби муқарраршудаи назорат, ҳисоботдиҳӣ ва риояи талабот амалӣ карда мешавад.

Созишномаи баимзорасида марҳилаи муҳиме дар ҷалби маблағгузории байналмилалӣ барои татбиқи устувори лоиҳаи НБО «Роғун» ба ҳисоб меравад.

Созишномаи мазкур барои Тоҷикистон имконияти ҷалби захираҳои иловагии дарозмуҳлати молиявиро ҷиҳати анҷом додани яке аз муҳимтарин лоиҳаҳои миллии инфрасохторӣ фароҳам меорад.

Татбиқи муваффақонаи лоиҳаи НБО «Роғун» ба таҳкими истиқлолияти энергетикии кишвар, дастгирии гузариш ба истеҳсоли неруи барқи камкарбон ва таҳкими мавқеи Тоҷикистон ҳамчун истеҳсолкунандаи минтақавии неруи барқи тоза мусоидат хоҳад кард.